Porba de binos

Este eibento foi ourganizado pula ACREFA – Associaçon Cultural e Recreatiba de Fuonte Aldé. Ampeçou l anho passado i tubo tan buona aceitaçon que la repetiu astanho.
Las pessonas de l lhugar aderírun cun antusiasmo i segundo dous de ls porbadores que éran repetentes, la pinga ganhou culidade en relaçon al outro anho. Queda la dúbeda, se las ubas serien melhores ou se ls produtores aporbeitórun ls ansinamentos que ls einólogos le dórun.  Un de ls porbadores, pordutor de bino biológico an Freixo de Spada a la Cinta, amostrou um pequeinho filme subre la sue sploraçon i splicou  ls métodos i técnicas de tratamento i fabricaçon deste bino.
Houbo prémios i lhambráncias para todos ls partecipantes, i na fin para que toda la giente podiesse porbar tamien de todas las pingas, la ACREFA serbiu ua pequeinha merenda a acumpanhar adonde todos tubírun la ouportunidade de porbar tamien l bino biológico de l tiu Gilberto Pintado, D’ Freixo Wine.