La Biquipédia – ua nuoba cunquista pa l Mirandés

Nun ye todos ls dies que ua nuoba lhéngua se apersenta nesse lhargo stendideiro de lhénguas i anformaçones, que ye la Biquipédia, i pa l mirandés repersenta un feito notable que hai mui pouco tiempo nun cuidábamos possible. Deiqui palantre, l mais de las anformaçones subre l mirandés muita giente las eirá a buscar ende, de modo que hai que tratar bien esse meio de anformaçon para que apersente ua anformaçon cada beç mais cumpleta i cada beç mais segura. Hai que star de uolhos abiertos para que essa anformaçon nun seia cumpletamente çfigurada solo porque ye lhibre la scrita na Biquipédia. Esso eisige que ls mirandeses le bóten mais ua correia al cuorpo para que la perséncia de la nuossa lhémgua seia dina i séria, esse passa tamien a ser un deber de todos nós: acrecentar nuobas anformaçones, corregir l que nun stá bien, aperfundar, i por ende afuora.
Hoije, ua lhéngua ten que eisistir tamien na anternete i na Biquipédia i noutros sítios birtuales que ténen la puorta abierta para todo l mundo. L mirandés cada beç mais ten que cuntinar a ir por esse camino, anque yá muito haba sido feito. Nada desso stá an cuntradiçon cun l sfuorço que se faga para que las pessonas cada beç mais fálen la sue lhéngua i cada beç mais i melhor la scríban. Son mundos defrentes adonde debe de bibir la lhéngua i an todos eilhes ten de bibir i a todos eilhes hai que le dar atencion, puis de todos eilhes la lhéngua mos bózia, nun me abandónedes!