San Pedro de la Silba eimougura státua de l padroneiro
San Pedro
Biba l nome San Pedro
De quien tanto se oube falar
Ficais de çantinela
I cun las chabes de l lhugar
Quiero-bos dezir tiu San Pedro
Que la nuossa tierra nun ye mala
Stais ne l meio de l lhugar
De nuite i de die a guardá-la
La nuossa tierra ten bun nome
Sodes l nuosso padroneiro
Bien podeis cun la porsora
Que gastou cun bós tanto denheiro
Tengo pena de bós
Bai-se-bos a derretir l’alma
Ne l Ambierno cun muito friu
I ne l Berano cun tanta calma
Ides a ficar de pies
Bien podiedes star santado
A caçar ranas ne l tanque
I a fregi-las na tasca al lhado
Sodes un Santo guapo
L que nun ye cousa rara
Agora standeis l braço
Pra mos mandar pra la Xara
You pa la Xara nun bou
Hai alhá muito sartigalho
Mandai-me antes pa la taberna
A strenar alhá un baralho
Bou-bos a dezir ua cousa
I que bos fique bien lhambrada
Quando you fur a tener al cielo
Nun téngades la puorta cerrada
Francisco Afonso Fidalgo
