Ls Lenga Lenga – Gaiteiros de Sendin

Zde hai nuobe anhos para acá, ls Lenga Lenga fazírun un lhargo camino que, nun cierto sentido, puode ser un speilho de l que hoije se passa cula música tradecional popular mirandesa: al mesmo tiempo que cuntina biba la tradiçon a todos ls nibles i se busca lhebá-la mais loinge, sinte-se que nuobos aires assópran, aires de renobaçon i de modernidade. Este ye l solo camino pa la tradiçon cuntinar a ser l que ye, hai que la renobar sien altarar ls sous prencípios, la sue eidentidade, sien atupir l beneiro de adonde mana. Mantenendo ls temas tradecionles ne l repertório i ousando ls strumientos tradecionales, ls Lenga Lenga ándan a ambolbé-los an nuobos ritmos, a lhebá-los para nuobos ambientes, a poné-los a cumbibir cun nuobos sonidos, i esse ye un camino que hai que ancentibar i acarinar. La forma séria cumo ténen benido a spurmentar cousas nuobas, l modo cumo ajúntan l antigo cul moderno, l ponéren a la par giente moça cun giente cun mais spriença, l ajuntar l sonido de ls strumientos cula boç i cun nuobos strumientos cumo l biolino, ls Lenga Lenga amóstan coraige ne l camino que stan a seguir, i esto sien an nada renegáren la fuorça de la música tradecional. Speramos que lhieben este camino mais loinge i stamos ciertos que nuobas sprienças se seguiran, até al punto de chegáren a la produçon própia, cun músicas oureginales tamien eilhas assentes na tradiçon, que percisa de se renobar i de alhargar l sou repoertório als tiempos nuobos i a las preacupaçones de hoije. Ténen sido ls músicos i ls dançadores ls mais fantásticos ambaixadores de la cultura i de las gientes de Miranda, lhebando cun eilhes l génio criatibo de ls nuossos antrepassados. Que este génio criatibo se manten na mocidade de hoije, ye ua certeza que ls Lenga Lenga i outros músicos mirandeses mos dan. Quien quejir coincé-los melhos puode ir a http://www.myspace.com/lengalengagaiteirodesendim i a http://www.lengalenga.pt

FM (FUOLHA MIRANDESA) – Quando se formou l grupo Lenga Lenga i cun que pessonas?
LL (LENGA LENGA) – L grupo Lenga Lenga formou-se a 19 de júlio de 2000, sendo sou fundador i eilemiento eissencial Henrique Fernandes, gaiteiro que ben dua família de gaiteiros, la família de Fernandes, que yá bai an cinco giraçones de gaiteiros, zde 1865, que inda hoije ténen cumo nomeada Ls Gaiteiros. Ye un grupo de música popular tradecional mirandesa, que, para alhá de Henrique Fernandes (gaita de foles), fui ne l ampeço formado por Manuel Falcão (caixa de guerra) i Raul Martins (bombo)
FM – L Lenga Lenga apareciu cumo un grupo de música tradecional mirandesa, tanto a nible de strumientos, cumo de repertório musical. Qual fui la buossa eideia nessa altura?
LL – L’eideia de ampeço fui custituir un grupo de música tradecional mirandesa, a la ua que nun deixasse perder la musicalidade i ls temas tradecionales mirandeses acumpanhados cun gaita de foles i a la outra mantener ua puonte antre las giraçones mais antigas de gaiteiros mirandeses i las nuobas giraçones que ampeçában a aparecer nas tierras de Miranda.
HF (HENRIQUE FERNANDES) – Hai que dezir que you siempre defendi un modo de tocar que assenta nua técnica de digitaçon própia, que passou de pai para filho na mie família. Cumo bi que esse modo de tocar stába an peligro de se stinguir, senti que habie andrento de mi la oubrigaçon de nun deixar perder la musicalidade i ls temas tradecionales mirandeses acumpanhados cun gaita de foles.
FM – Assi i todo, para alhá de partecipardes an fiestas tamien teneis benido a eiditar CD’s. Quei eiditestes até agora?
LL – L grupo ten un CD, “Lenga lenga no 4º Festival Intercéltico de Sendim”, que fui grabado al bibo nesse festibal, i eiditado pula Sons da Terra.
HF – Para alhá desse CD tengo trabalho de recuolha subre miu abó an 1975 i cula mie partecipaçon, «António Fernandes e Henrique Fernandes, gaiteiros em tradição», eiditado pula Sons da Terra. Tengo tamien partecipaçon an dous outros CD’s: «Povo que Canta» i an “1º Encontro de Gaiteiros do Planalto Mirandês e Nordeste Trasmontano”.
FM – Mas la buossa eideia ten benido a ebeluir. Cumo i porquei?
LL – Nestes 9 anhos de eisistença de l grupo, para alhá de algues altaraçones nas formaçones, fui eibeluindo tamien an eideias i na própia eideia de l grupo. Atualmente l grupo ye cumpuosto por quatro eilemientos: Henrique Fernandes; Dinis Arribas Pires, que ye un moço gaiteiro, nieto de l tiu Ángelo Arribas, custrutor i tocador de gaita de foles mirandesa i fraita pastoril; David Jantarada i Telmo Ramos, dambos a dous tocadores de bários strumientos de piel que ban zde la caixa de guerra, pandeiro, bombo, tamboril, pandeireta, i tamien conchas de Santiago, castanhuolhas, etc. Esta nuoba formaçon, zde 2007 que le trouxo un nuobo cunceito al grupo cula antroducion de nuobos temas, ende ancluidas las bozes an temas tradecionales mirandeses, todos eilhes cun arranjos feitos puls quatro eilemientos de l grupo.

Anterbista de Amadeu Ferreira
(Continua no próximo número)