Ls Dançadores de Fuonte Aldé an França

«Benga a ber i cumbide un amigo a partilhar este die de anibersairo de la Lhibardade i de la Democracie» staba screbido ne l cumbite, mas l mais stroudinairo para mi fui çcubrir que antre ls quatro grupos perbistos ne l programa para mos rebelar las sues danças i tradiçones, dous deilhes éran de l própio departamiento de l Alto Garona, un staba anunciado cumo sendo nada mais nada menos que l «Grupo de ls Pouliteiros de Miranda» ! Mandei lhogo un mail pa l Consulado General a dezir que habie quedado cuntentíssima i que staba cumbencida que la partecipaçon desse grupo stramuntano podie tamien cuntribuir para dar a cunhecer la Lhéngua Mirandesa, hoije Segunda Lhéngua Oufecial de Pertual, lhéngua que todos nós siempre oubimos i queremos tamien cuntinar a falar tal i qual la falában i inda la fálan ls nuossos abós, ls nuossos pais, ls nuossos familiares, bezinos i amigos.
Talbeç este miu «mail» tenga modestamente cuntribuído para que – nesse Demingo, 3 de Maio, die de sol!, yá na fin de la tarde, nua sala adonde se juntórun talbeç uas quatrocientas pessonas antre las quales muitos Pertueses i lusodecendientes oureginairos de bárias regiones de Pertual cumo tamien Franceses antressados an cunhecer melhor la nuossa cultura pertuesa – oubíssemos tamien un de ls moços de ls Pouliteiros a fazer un guapo çcurso nun heisitando a falar Mirandés para apresentar l grupo: mais percisamente L Grupo de ls Pouliteiros de Fuonte Aldé.
Fui amportante esse Festibal i talbeç einesquecible la partecipaçon desses Pouliteiros. Para muita giente que alhá stubo persente i que quedou ancantada cula la música cumo tamien culas acrobacies que al cuntrairo de todos ls outros grupos eilhes fúrun capazes de fazer.
Talbeç siempre se lhembre i tenga tamien quedado ampressionado un de ls deputados de la Assemblé de la República eileitos puls «círculos» de la Eimigraçon tamien presente nesse Festibal… festibal durante l qual tamien fizo un çcurso an special para chamar l’atençon subre l boto de ls eimigrantes pertueses residentes ne l strangeiro an botar nas eileiçones legislatibas que se ban a realizar talbeç yá an Outubre an Pertual.