Faç-se stória an Mirandés: certeficaçon de l 9º anho antegralmente an mirandés, ne l Anstituto Piaget

Zde Maio de l anho atrasado, un tagalho de pessonas de San Pedro de la Silba stubo a zambolber l Porcesso de Reconhecimiento, Balidaçon i Certeficaçon de Cumpeténcias (RVCC) cun l CNO de l Anstituto Piaget de Macedo de Cabaleiros. Un grupo dessas pessonas acabou die 16 de Márcio, cun l Júri de Certeficaçon i fúrun todas balidadas cun l certeficado de l 9º anho, que reconhece i cumproba las cumpeténcias i ls saberes de que rialmente las pessonas son duonhas i úsan nas sues bidas.
Trata-se de zambolber un portefólio, adonde quéden spelhadas las bidas de las pessonas: l que bibírun, l que daprendírun, l que sáben fazer, para que le poderá serbir i cumo poderán melhorar i alhargar esses saberes. L porcesso acaba-se cun l Júri de Certeficaçon, adonde esses trabalhos son apersentados.
Para alhá de l registro de ls saberes de las pessonas, houbo eiqui muito trabalho de grupo i poude-se dezir que queda tamien un bun cembon de registros de ls usos, questumes, i tradiçones daqueilha aldé mirandesa i, por cierto, l spertar para la sue amportáncia. Muito deste trabalho puode ser bido ne l blogue que ls adultos fazírun ne l campo de las TIC – www.lgarrote.blogspot.com
Mas la grande nobidade ye que dues de las pessonas desse grupo pedírun para zambolber ls sous trabalhos ousando solo la lhéngua mirandesa – yá que ye ua lhéngua oufecial debe ser assi ancarada – i l CNO de l Anstituto Piaget resolbiu aceitar l zafiu.
Fui feito l pedido a la ANQ (Agéncia Nacional para la Qualificaçon), yá que se trataba de ua nobidade, i la outerizaçon fui dada, de maneira que Albertina São Pedro (colaboradora de la Fuolha Mirandesa muito por bias deste porcesso) i Luís Silva ténen l sou Júri de Certeficaçon marcado para dia 9 de Júnio, para çfender i apersentar trabalhos, an que solo fui ousada la lhéngua mirandesa, podendo-se assi dezir que fazírun l nono anho antegralmente Mirandés! Ye cun eilhes que se faç stória i todos ls que acraditórun neste porcesso i por el lhuitórun stan de parabienes i eiqui queda esse teçtemunho público.
Este júri de certeficaçon final será ourientado por Amadeu Ferreira – outeridade mássima quando se fala de lhéngua – i queda yá todo mundo cumbidado.
Eiqui queda l teçtemunho de Albertina São Pedro i Luís Silba, las dues pessonas que fazírun la certeficaçon antegralmente an mirandés.

Alfredo Cameirão